ໃນ ຄັ້ງວັນທີ 8-9 ພຶດສະພາ 2024 ຜ່ານມານີ້ ພະແນກເຕັກໂນໂລຊີ ແລະ ການສື່ສານແຂວງໄຊສົມບູນ ໄດ້ລົງເຄື່ອນໄຫວຢ້ຽມຢາມ ແລະ ພົບປະແລກປ່ຽນບົດຮຽນກ່ຽວກັບວຽກງານໃນຂະແໜງເຕັກໂນໂລຊີ ແລະ ການສື່ສານ ກັບກະຊວງເຕັກໂນໂລຊີ ແລະ ການສື່ສານ. ຊຶ່ງນໍາພາທີມງານໂດຍ ທ່ານ ດົວຊົ່ງ ເລ່ຍໂກ້ ເລຂາໜ່ວຍພັກ, ຫົວໜ້າພະແນກເຕັກໂນໂລຊີ ແລະ ການສື່ສານແຂວງໄຊສົມບູນ ພ້ອມດ້ວຍຄະນະ, ເຊິ່ງໄດ້ໃຫ້ກຽດຕ້ອນຮັບຈາກ ທ່ານ ບັນດິດ ສຈ. ບໍ່ວຽງຄຳ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງ ຕສ ແລະ ຕາງໜ້າບັນດາກົມທີ່ກ່ຽວຂ້ອງຢ່າງອົບອຸ່ນ.

 ນອກຈາກນັ້ນ, ໃນວັນທີ 9 ພຶດສະພາ 2024 ກໍ່ໄດ້ມີວາລະຈັດກອງປະຊຸມ ເພື່ອພົບປະແລກປ່ຽນປຶກສາຫາລືວຽກງານເຕັກໂນໂລຊີ ແລະ ການສື່ສານ ຢ່າງເປັນທາງການລະຫວ່າງ ພະແນກ ຕສ ແຂວງໄຊສົມບູນ ກັບ ກະຊວງ ຕສ ພາຍໃຕ້ການເປັນປະທານກອງປະຊຸມ ຂອງທ່ານ ພູຂົງ ຈິດຮູບໂລກ ຫົວໜ້າຫ້ອງການກະຊວງ ຕສ ແລະ ເຂົ້າຮ່ວມມີບັນດາທ່ານຫົວໜ້າກົມ, ສູນ, ອົງການທຽບເທົ່າ ແລະ  ຮອງຫົວໜ້າກົມ ພ້ອມດ້ວຍວິຊາການທີ່ກ່ຽວຂ້ອງເຂົ້າຮ່ວມ. ຈາກນັ້ນ ທ່ານ ດົວຊົ່ງ ເລ່ຍໂກ້ ຫົວໜ້າໜ້າພະແກນ ຕສ ແຂວງ ກໍ່ໄດ້ຂື້ນລາຍງານສະພາບການຈັດຕັ້ງປະຕິບັດວຽກງານ ຕສ ຂອງແຂວງໂດຍຫຍໍ້ ຕໍ່ທີ່ປະຊຸມໄດ້ຮັບຊາບ ແລະ ມີທິດຊີ້ນໍາຕໍ່ພະແນກຕື່ມ.

ໃນໂອກາດ ກອງປະຊຸມດັ່ງກ່າວ ຕາງໜ້າແຕ່ລະກົມ, ສູນ, ອົງການ ແລະ ພາກສ່ວນກ່ຽວຂ້ອງທີ່ເຂົ້າຮ່ວມນັ້ນ ກໍ່ໄດ້ພັດປ່ຽນຂື້ນລາຍງານ, ແນະນໍາວິທີການການຈັດຕັ້ງປະຕິບັດວຽກງານຂອງຕົນ ຕາມພາລະບົດບາດ, ສິດ ແລະ ໜ້າທີ່ ຂອງໃຜລາວ ຕໍ່ທີ່ປະຊຸມເພື່ອຊາບ ແລະ ໄດ້ສົນທະນາແລກປ່ຽນບົດຮຽນ, ປະສົບການ ຢ່າງກົງໄປກົງມາ ແລະ ມາຮອດວາລະສຸດທ້າຍຂອງກອງປະຊຸມ ທ່ານ ພູຂົງ ຈິດຮູບໂລກ ປະທານ ກອງປະຊຸມ ກໍ່ໄດ້ມີຄຳເຫັນສັງລວມ ແລະ ສະຫຼຸບຜົນຂອງປະຊຸມ ພ້ອມທັງກ່າວປິດປະຊຸມຢ່າງເປັນທາງການ.

ພາບ-ຂ່າວຈາກ: ຂະແໜງດິຈິຕອນ ແລະ ຄວາມປອດໄພທາງໄຊເບີ

ພະແນກ ຕສ ແຂວງໄຊສົມບູນ.