ພະແນກເຕັກໂນໂລຊີ ແລະ ການສື່ສານແຂວງໄຊສົມບູນ  ໄດ້ເປີດຊຸດຝຶກອົບຮົມ ການນໍາໃຊ້ລະບົບນັບຄະແນນສຽງເລືອກຕັ້ງ ໃຫ້ພະນັກງານບັນດາພະແນກການ, ອົງການອ້ອມຂ້າງ ແຂວງໄຊສົມບູນການຝຶກອົບຮົມ ລະບົບນັບຄະແນນສຽງເລືອກຕັ້ງ ໃຫ້ບັນດາພະນັກງານ ອ້ອມຂ້າງແຂວງ ໃນຄັ້ງວັນທີ 23 ກໍລະກົດ 2024 ແລະ ໄດ້ປິດລົງໃນຕອນບ່າຍຂອງວັນທີ 24 ກໍລະກົດ ນີ້ ພາຍຫຼັງທີ່ໄດ້ດໍາເນີນມາເປັນເວລາ 2 ວັນ ທີ່ຫ້ອງປະຊຸມຫ້ອງວ່າການແຂວງ ຫ້ອງ 504 ໂດຍການເປັນປະທານ ຂອງທ່ານ ວຽງຄໍາ ລີຫວັງເສີ, ຮອງຫົວໜ້າພະແນກເຕັກໂນໂລຊີ ແລະ ການສື່ສານແຂວງ, ມີວິທະຍາກອນພາຍໃນພະແນກເຕັກໂນໂລຊີ ແລະ ການສື່ສານແຂວງ ຕະຫຼອດຮອດສໍາມະນາກອນ ຈາກບັນດາພະແນກການ, ອົງການອ້ອມຂ້າງແຂວງ ເຂົ້າຮ່ວມ.

ໃນພິທີ ທ່ານ ແພງແກ້ວ ໄຊຄຸນສິດ ຫົວໜ້າຂະແໜງເຕັກໂນໂລຊີ ແລະ ນະວັດຕະກຳ ໄດ້ລາຍງານວ່າ ຕະຫຼອດໄລຍະ 2 ວັນ ຂອງການຝຶກອົບຮົມ ບັນດາວິທະຍາກອນໄດ້ເອົາໃຈໃສ່ຖ່າຍທອດຄວາມຮູ້ກ່ຽວກັບໂປຣແກຣມນັບຄະແນນສຽງ ໃຫ້ແກ່ສໍາມະນາກອນ ທັງພາກທິດສະດີ ແລະ ພາກປະຕິບັດຕົວຈິງ ເປັນຕົ້ນແມ່ນຄວາມໝາຍ-ສໍາຄັນ ແລະ ຄູ່ມືການນໍາໃຊ້ ລະບົບນັບຄະແນນສຽງເລືອກຕັ້ງ ພ້ອມທັງນໍາພານັກສໍາມະນາກອນຕິດຕັ້ງລະບົບໂປຣແກຣມ ແລະ ທົດລອງນໍາໃຊ້ລະບົບນັນຄະແນນສຽງເລືອກຕັ້ງຕົວຈິງ ໂດຍໄດ້ມີການຖາມ-ຕອບ ເພື່ອປະກອບຄໍາຄິດຄໍາເຫັນແລກປ່ຽນບົດຮຽນເຊິ່ງກັນ ແລະ ກັນ. ຊຶ່ງຜ່ານການຝຶກອົບຮົມ ເຫັນວ່າສໍາມະນາກອນມີຄວາມເຂົ້າໃຈຕໍ່ລະບົບໂປຣແກຣມເປັນຢ່າງດີ ໂດຍໄດ້ສະແດງອອກຄື ມີສໍາມະນາກອນທີ່ຮຽນໄດ້ດີ ຈໍານວນ 16 ທ່ານ ເທົ່າກັບ 69,56% ຂອງຈໍານວນສໍາມະນາກອນທັງໝົດ 23 ທ່ານ. ຈາກນັ້ນ, ທ່ານ ວຽງຄໍາ ລີຫວັງເສີ ໄດ້ມີຄໍາເຫັນເນັ້ນໜັກໃຫ້ສໍາມະນາກອນ ຈົ່ງພ້ອມກັນນໍາເອົາບົດຮຽນໃນຄັ້ງນີ້ ໄປໝູນໃຊ້ເຂົ້າໃນການເຄື່ອນໄຫວວຽກງານຂອງຕົນ ໃຫ້ເກີດປະໂຫຍດສູງສຸດ ເປັນຕົ້ນແມ່ນການນັບຄະແນນສຽງເລືອກຕັ້ງຕ່າງໆ ໃຫ້ມີຄວາມສະດວກ, ວ່ອງໄວ, ໂປ່ງໃສ ແລະ ຖືກຕາມທິດທາງຂອງລັດຖະບານ ໃນການຫັນເປັນທັນສະໄໝ ຫຼື ດິຈິຕ່ອນ ເທ່ືອລະກ້າວ.

ຂ່າວ-ພາບ: ຄັດຈາກ ຈົດໝາຍຂ່າວແຂວງໄຊສົມບູນ.